CEBU, Philippines - Damgo ni ALA Promotions president Michael Aldeguer nga mabutang ang Pilipinas sa mapa sa boxing isip nasud nga labing dagha'g world champions.
Gumikan niini, ang numero unong boxing promotion sa nasud mipalagda sa duha ka masaarong boksidor aron mopuno sa lista sa mga Filipino world title contenders.
Sa press conference kagahapon didto sa Diamond Suites and Residences, ang ALA Promotions mipresentar atubangan sa mga media nila ni world rated minimumweight prospect Rommel 'Little Assassin' Asenjo (20-2, 16KOs) ug undefeated featherweight Lorenzo 'Thunder Volt' Villanueva (19-0, 18KOs).
Sila si Asenjo ug Villanueva nga pulos sab giagak ni boxing patron Manny Piñol, mipirma og tulo ka tuig nga kontrata ug mopakita na kini sa ilang abilidad sa mga umaabot nga dagkung boxing events sa ALA.
Si Asenjo, 20-anyos mo-away alang sa interim WBO minimumweight title batok ni Raul Garcia karong Abril 30 didto sa Mexico City.
Kun modaog, unya ibakante na ni WBO minimumweight champion Donnie Nietes ang bakus aron mosaka sa light flyweight division, mapunta na ngadto ni Asenjo ang regular title.
"Daku gyud ko'g pasalamat sa ALA Promotions ug ako gyud buhaton ang tanan karong Abril 30 para madala nako ang bakus dinhi sa atong nasud," matud pa ni Asenjo.
Sa iyang bahin, daku usab og pasalamat si Villanueva ngadto sa ALA Promotions nga moseguradong dili mausik ang abilidad niini sa boksing.
Si Villanueva mohimo sa iyang debut ubos sa ALA Promotions karong Abril 9 sa undercard sa away ni Nietes ug Mexican Armando Vasquez sa Pinoy Pride 5 didto sa Bacolod City. - BANAT NEWS