NBA fans naukay

CEBU, Philippines - Naukay sa makadiyot ang mga NBA fans nga misaksi sa duwa tali sa host Los Angeles Clippers batok sa Cleveland Cavaliers kagahapon dihang usa ka wala hiilhing tawo ang gisikop tungod sa pagbitbit og steak knife atol sa 100-92 nga kadaogan sa Clippers sa nagpdayong duwa sa NBA didto sa Staples Center sa Los Angeles, California.

Kini maoy nakapaukay sa mga fans sa NBA nga nahitabo usaka oras kapin sa wala pa ang duwa ug gipagawas una sa makadiyot ang katawhan dihang gibuntog sa kapolisan ang suspetsado nga nagpa-atbang sa bench sa Cavaliers.

Ang duha ka teams gipasulod una didto sa ilang tagsa-tagsa ka dressing rooms samtang nagpadayon ang diyotay’ng kasikas diin napugos ang kapolisan sa paggamit og beanbag gun ug giposasan siya padulong sa gawas sa benyu.

Wala hinoon makalangay sa duwa ang maong hitabo nga gisundan sab dayon sa duwa sa NHL tali sa King batok sa Anaheim Ducks.

Ang coach sa Clippers nga si Vinny Del Negro ug si Byron Scott sa Cavaliers mihangyo unta nga dugangan ang oras sa ilang warm-up apan gibalibaran sila.

“There aren’t too many knife standoffs in Oklahoma— not that I can remember. So it’s a first for me,” matod pa sa rookie nga si Blake Griffin sa Clippers kinsa lumad nga taga Oklahoma diin siya nagtungha sa kolehiyo.

Si Griffin midugang sa pagbatbat “I was sitting in here next to D.J. (DeAndre Jordan) and Randy Foye came in and said: `Yo, somebody just pulled a knife.’ I was like, `What?’ And then they explained the whole thing. We were trapped in here for a while. But both teams had to go through it, so it didn’t really put us at a disadvantage.”

Si Griffin maoy nangu sa Clippers sa iyang 30 puntos ug walo ka assists ug maoy yawe sa ilang kadaogan aron mabugto ang ilang nine-game losing streak batok sa Cavaliers. Si Eric Gorodn miburak og 29 puntos atol sa iyang pagbalik sa Clippers’ lineup.

Ang Clippers nakabawos sab sa ilang 119-126 nga pilde sa Cavs sa overtime niadtong Pebrero 11 nga maoy nagputol sa NBA-record 26-game losing streak sa Cavs.

Sa laing duwa, nakaipsot ang Boston Celtics batok sa New Orleans Hornets, 89-85,midaog ang Miami Heat batok Denver Nuggtes, 103-98, gilubong sa Memphis Grizzlies ang Indiana Pacers, 99-78, midaog ang San Antonio Spurs batok sa Charlotte Bobcats, 109-98 ug midaog ang Portland Trail Balzers batok sa Philadlephia Sixers, 110-101. (BANAT NEWS)