SCSIT, Ave Maria mosalida

CEBU, Philippines - Ang co-leaders Salazar Colleges of Science and Institute of Technology (SCSIT) Skyblazers ug ang Ave Maria Sanctuary Park mosuway pag-inat sa ilang way pilde nga rekord sa dihang ilang banggaon ang tagsa-tagsa nila ka kaatbang karong adlawa sa pagpadayon sa 1st M. Lhuillier Kwarta Padala-Cebu Basketball Association (MLKP-CBA) season diha sa USC main gym.

Ang Skyblazers (2-0) ubos sa pagpangulo ni Jimwell Torion, moharong sa Hotel Fortuna (1-1) sa pasiunang duwa sa alas-4 sa hapon.

Kun itandi, ang Skyblazers mas nakabentaha    batok sa Hotel Fortuna tungod kay aduna sila’y dominanteng sentro nga si 6-foot-8 Rino Berame ug beteranong floor leader Mark Abadia.

Sa ilang bahin, ang rag-tag nga Hoteliers mosandig sa ilang mga batos nga kadaghanan gikan sa SWU Cobras kansang gipaspason ug kaabtik maoy ilang himuong hinagiban.

Ang Skyblazers mosandig nilang Jayford Rodriguez, Joseph Guangco, Ronan Isidro, Leodie Garcia ug Elvis Labares.

Si Hotel Fortuna coach Pablo Yu nanghinaot nga mogana ang dula nilang   Aard Evan Diango, Ritchie Jalandoni, Clefford Maguate, Jefferson Pria, Cris Litorja, Gilbert Gallarde ug Mark Manigque.

Sa laing bahin, ang Ave Maria daku'g purohan nga modaog tungod kay mas lig-on sab kini og line-up itandi sa Talisay City.

Pangulohan ni ex-pro Jercules Tangkay, ang Ave Maria magsalig sab sa ilang pambato nga naglakip nila ni Ope Abellana, Danny Aying, Jerry Cavan, Alex Cainglet, Manny Gabas, Enrico Llanto ug Aldrin Ocañada.  (BANATSPORTS)