CEBU, Philippines - Adunay 143 ka mga bata gikan sa Visayas ug Davao ang mipakita sa ilang abilidad sa Cebu Regional Selection Camp sa 2011 Jr. NBA Philippines Program nga gipasiugdahan sa Alaska sa miaging adlaw didto sa Sacred Heart School sa Gen. Maxilom Avenue.
Ang selection camp gipangulohan ni NBA Asia Head of Basketball Operations Jama Mahlalela uban sa abag sa Jr. NBA appointed coaches Jojo Lastimosa, Elmer Cabahug, Roehl Gomez ug Topez Robinson.
Napulo ka bata ang nadala isip best players sa Visayas regional selection. Kini naglakip nila ni Mhike Spencer Patalinghug, Noel Villaceran ug Niño Dave Paon sa University of the Visayas; Miguel Compeente sa Holy Child School-Davao; Jude Luke Bulan ug Arnie Christian Padilla sa University of San Carlos-North; Godard Barbosa ug Randell Senining sa University of San Jose-Recoletos ug Jair Edrei Igna ug Dawn Hynric Ochea sa Sacred Heart School-Ateneo de Cebu.
Nanghawod sila sa vitals checks, tests of speed, stamina, flexibility ug vertical leapin ability.
Nakakuha sab sila og labing taas nga iskor sa lima ka nagkalain-laing skills stations -- Alaska Layup Station, Gatorade Dribbling Station, Hi-Smart Shooting Station, BTV Passing Station ug Asia Miles Footwork Station.
Human sa Cebu, tulo pa ka regional selection camps ang ipahigayon didto sa Bacolod City karong adlawa, Laguna sa Marso 24 ug Manila sa Marso 26.
Ang top 10 players sa Bacolod, Laguna ug Manila ug ingon man 10 best players sa Alaska Power Camp makig-uban sa top 10 gikan sa Cebu alang sa Jr. NBA National Training Camp didto sa Xavier School Gym sa Greenhills, San Juan karong Abril 9-10.
Ang selection sa top 10 players gikan sa 50 ka national training camp participants himuon karong Abril 11 didto sa SM Mall of Asia. (BANAT NEWS)