CEBU, Philippines - Nakalingkawas ang Viking Haulers sa ilang sikit kaayo nga duwa batok sa Orillaville, 67-66 sa 3rd F. Llamas Youth Association (FYA) didto sa sitio Manggahan open court sa barangay Punta Princesa, ning dakbayan.
Tataw na untang modaog ang Orillaville dihang naglabaw sila og uno punto, 66-65 ug kinahanglan lang sila modepensa'g maayo aron mapupos ang nahabiling singko segundos sa duwa, apan nagbayad sila sa ilang dakung defensive lapse dihang wala nila mabantayi ang layo kaayong baseball pitch ni Dondon Cadungog gikan sa baseline aron makalugar og lay-up si Paul Basalo, kinsa maoy mi-iskor sa winning basket, 67-66.
Si Cadungog mao sab ang nangu sa Viking sa iyang 30 puntos, samtang si Basalo adunay nuybe puntos.
Sila si Daniel Enriquez ug Ryan Tampus nagkumboya og 23 puntos aron pangulohan ang pilderong Orillaville.
Ang Viking ug Orillaville kasamtangan karong nagtabla sa managsama nilang 1-2 nga baraha.
Sa pasiunang duwa, gilat-an sa Habagat Cockers ang defending champion Simpolang Barbecue Haus, 100-72.
Ang managsuong Nico ug Tata Laborte nagmangtas sa opensa aron pangulohan ang Habagat sa ilang 21 ug 20 puntos matag usa.
Si Ryan Villaver, kinsa mi-iskor og 20 puntos mao sab ang nangu sa Simpolang nga wala pa katilaw og daog sud sa tulo nila ka duwa.
Ang torneyo sa FYA gipaluyohan sab ni tournament director Boy Atillo.
PUNTOS MATAG USA
Unang duwa:
Habagat (100) - N. Laborte 21, T. Laborte 20, Marata 10, Arias 9, Bahina 6, Aunzo 2, Oropa 2
Simpolang (72) - Villaver 20, Abella 10, Medalle 9, Aglipa 9, J. Canceko 6, Trinidad 6, Zapanta 4
Ikaduhang duwa:
Viking (67) - Cadungog 30, Basalo 9, Lañojan 8, Sydiongco 8, Avila 7, Cal 3
Orillaville (66) - Enriquez 12, Tampus 11, Unabia 10, Dumaguit 10, Tabada 9, Jabonero 6, Elvis 4, Endrina 2, Osorio 2 (BANAT NEWS)