IgiMax nasulod sa top 10 sa Tour of Clark

CEBU, Philippines - Bugtong pambato sa Sugbu nga si Luis 'Igi' Maximo mipahiluna sa ikaunom nga dapit sa 42K Criterium Race sa Tour of Clark sa miaging adlaw didto sa Clark Economic Zone sa Pampanga.

Ang 15-anyos nga si Igi, tinun-an sa PAREF-Springdale School maisugong nakigginukdanay batok sa mga elite 18-Under cyclists sa tibuok Pilipinas aron malusot sa top 10 finishers.

Si Igimax mitapos sa tungason nga rota sa oras nga 1:22.09, nagsunod sa kampiyon nga si Emil Tagara sa Nueva Ecija sa oras nga 1:15.26.

Ang Manila riders nga sila si Miguel Gonzales (1:16.00) ug Kenneth Balunsay (1:16.18) maoy mi-okupar sa ikaduha ug ikatulo nga dapit, samtang si John Rili (1:19.48) sa Batangas ug Allen Santiago (1:19.49) mao ang mikompleto sa top five finishers sa 18-Under category.

Alang ni Igimax, usa na kini ka dakung kalampusan tungod kay wala siya'y saktong ensayo kay daghan pa kining giasikaso sa tunghaan.

Ang SAC awardee ug three-time Phil Premiere Cycling League champ nga si Igimax gisuportahan sa YKK Trading, Maximax Air-conditioning ug PAREF-Springdale School.  - BANAT NEWS