Chao Sy mireklamo sa iyang boksidor

CEBU, Philippines - Mipasaka og reklamo didto sa buhatan sa Games and Amusements Board (GAB) ang boxing promoter ug Chao Sy Stable owner nga si Lorenzo 'Chao' Sy batok sa iyang kanhi boksidor nga si Arnel Dunal.

Gusto ni Sy nga patangtangan og lisensiya si Dunal ug pahamtangan og lifetime ban. Kini tungod sa pagkumpisal sa 28-anyos nga si Dunal nga iyang gisurambaw ang away niya batok ni Jimrex 'The Executioner' Jaca niadtong Sabado sa main event sa "The Night of the Gladiators" boxing card didto sa Tabunok Sports Complex sa Talisay City.

Si Jaca midaog sa maong away pinaagi sa third round TKO dihang si Dunal misenyas nga dili na motiwas sa pakigsangka ibabaw sa ring.

Si Sy maoy opisyal nga nalista sa GAB isip contractual manager ni Dunal sukad niadtong   2008. Si Dunal maoy last minute replacement ni William Gonzales kinsa wala tugoting moaway tungod sa isyu sa droga.

Sayo ning tuiga, si Dunal mipahibalo ngadto ni Sy nga mo-retiro kay naglaraw siyang molarga sa Canada. - BANAT NEWS