Ccupa ni Yoly Cena ug derby ni Chao Sy

CEBU, Philippines - Seguradong malingaw na sab ang mga batos ug ginsakopan sa mga inilang Customs brokers dinhe sa Sugbo atol unya sa pagbukas sa ilang torneyo karong umaabot Marso 26, adlaw’ng Sabado nga anha ipahigayon sa barangay Cogon Ramos gym.

Kini mao ang 2011 Cebu Customs United Personeros Association (CCUPA) basketball tournament nga gipasiugdahan sa mahiligon kaayo’g basketball ug presidente sa CCUPA nga si Yoli Cena.

Adunay mosalmot nga pito ka teams ug kini mao ang CCUPA, Pimentel D-Force nga gipanag-iya ni Marty Pimentel, MJDL mga initials sa batan-ong broker nga si Michael Jude D. Logarta, Canillas-Gonzales, MAJOS, CEBAMA ug Allen customs Brokerage.

Bugtong tuyo ni Cena nga magkasinabot ang iyang mga sakop ug mga brokers pinaagi sa duwang basketball kay sa kinaiyahan sa ilang trabaho, kinahanglan sab nila ang paugnat sa kusog o physical fitness gawas lang sa gi-ingon nga camaraderie o pakighugoy-hugoy sa mga brokers.

Kalipay og dako ni Cena nga anha nila ipagawas ang ilang kalaay sa opisina sa korte sa basketball diin sila magkinataw-anay atol sa duwa. Bisan pa gani’g dili makasulod kini si Cena malipay lang gihapon siya basta ang importante nga malingaw gyud tanan ang iyang mga kauban.

Si Pimentel usa sab ka mahiligon kaayo’g basketball apan kanunay lang kining magpa-low profile ug mahilumon kaayo ug sukwahi ni Mike kinsa gi-ilang maoy labing “bankable” nga Customs broker sa Sugbo nga kusog kaayong mopasiaw. Si Mike sab maoy labing daghang fans sa tanang brokers ilabi na gyud og mag-igo siya gikan sa three-point territory ug usa sa nag-idolo kaniya mao si Noel Dacumos nga usa sab ka broker.

Laing grabe ka mahiligon og basketball mao sila si Roy Canillas ug Art Gonzales kinsa maoy tag-iya sa Canillas-Gonzales Brokerage. Samtang mahiligon moduwa si Art, si Roy nga kanhi usa sa Top 10 sa Brokers licensure exam sa UC, mahiligon sab mag-coach.

Wala pa ako makaila sa mga team owners sa MAJOS, CEBAMA ug Allen Brokerage tungod kay mga bag-o silang sakop sa CCUPA. Ang ako lang nahibaw-an nga kining MAJOS mga initials sab kinsa upat ka team owners nga gikumbenar ug kining CEBAMA gidumala kini sa mga brokers nga tua mag-base sa Surigao City.

Tataw gyud nga alegre kining uma-abot nga torneyo sa CCUPA tungod kay usa kini ka lig-on kaayong grupo nga pulos gyud mahiligon sa sports dili lang sa basketball apan hasta sab sa volleyball, chess, darts, bowling ug lakip pa gani ang golf nga maoy hilig sa mga adunahang tag-iya ug mga managers.

BANAWA DERBY. Gipahibalo sa promoter nga si Lorenzo “Chao” sy nga ang iyang derby sa Banawa karong Marso 18 (Biyernes) usa ka makasaysayanon tungod kay mao kini ang kataposang sabung nga ipahigayon diha sa maong cockpit arena o buwangan.

Akong nahibaw-an gikan ni Chao nga ang Banawa cockpit himoon na sa dili madugay nga usa ka mall nga tukoron sa pamilyang Gaisano.

Busa gidapit ni Chao ang tanang mga mahiligon sa sabung sa pagsal-mot sa maong derby ug sa kasamtangan, malipayon kaayo si Chao tungod kay miabot na ngadto sa 41 ka entries ang iyang nadawat ug sumala pa niya, mao kini ang labing daghan nga partisipasyon sa tanang derby nga iyang gi-promote.

Tungod kay iya nang hipanglantawan ang kalamposan niining maong derby, si Chao mo-usab og promote unya sa Hulyo. Atangi ninyo mga higalang sabungero.

MISCELLANEOUS. I woul like to say thanks to Chao and my friend Moncrief Rogado for their birthday gifts to me last March 11 when I turned a year older.  - BANAT NEWS