CEBU, Philippines - Masulob-ong adlaw alang sa Japan ug bisan na dinhi sa atong nasud tungod sa pag-igo sa 8.9 magnitude nga linog niadtong milabay’ng adlaw.
Daghan karon ang nakaingon nga basin matinuod ang nahitabo sa salidang ‘2012’ sus! Simbako palayo intawon.
Pero kutob lang ta ani simbako!...pito ka lawod…etc.etc.. pero daghan gihapon kanato ang walay pagpakabana sa atong kalikupan bisan sa simpleng paglabay nalang sa atong mga basura sa saktong butanganan.
Kining akong topic karon medyo may pagka-seryoso kini agi usab og paghatag sa atong bumabasa sa gamay’ng ‘overview’ sa nanghitabo karon.
Ato nalang iampo ang atong kaugmaon nga dili ta paninglon sa atong kinaiyahan. Sa pagkatinuod lang dili baya layo ang posibilidad nga mahitabo ang 2012 nga salida.
Nagkainit na ang kalibutan karon tungod sa kabaga sa aso nga nagtabon sa atong kalangitan mugna sa polusyon, dugang pa ang nagtipun-og nga mga basura bisan asa.
Mga timailhan sa gitawag nga ‘global warming’ ang nasinati natong grabeng kainit sa normal lang unta nga panahon sa ting-init; ang pag-ulan panahon sa ting-init; naglagiting nga init panahon sa ting-uwan; ang pagbuto sa mga bulkan dili lang sa Pilipinas kundili hasta sa ubang mga kanasuran, tsunami, ug uban pang kalamidad.
Ang mga eksperto sa geology ning bag-ohay lang miingon nga paspas na kaayo ang pagsaka sa level sa tubig sa dagat. Niadtong miigo ang linog sa New Zealand duha ka semana na ang nakalabay, adunay gibana-banang 60 trilyones toneladang ice nga milyones na ka tuig ang pangidaron diha sa arctic ocean ang nasiak ug naanod sa dagat.
Timaan kini nga init na gyud ang kalibutan, ug pagbuto sa mga bulkan daw pagpahungaw lang kini sa yuta, ug ang kainit maoy mibuak ug mihilis sa mga ice sa North Pole ug South Pole.
Ang init sa adlaw nga mosulod sa kalibutan dili makauntol balik sa gawas sa kawanangan tungod sa kabaga na sa polusyong miali niini sa kalangitan hinungdan usab sa pagdako sa buslot sa atong ozone layer.
Dili man tuod kita eksperto niini apan sa akong yanong pagsabot base sa atong mga nabasahan dili layo kining atong naobserbahan sanglit ang tanang nanghitabo konektado.
Sama pananglitan nga ang tanang bulkan sa kalibutan konektado pinaagi sa mga sanga-sanga nga sama sa tunnel sa ilawom maong kung mobuto ang usa adunay posibilidad nga mosunod og buto ang uban sa dili madugay.
***
Ari ta sa boksing, karong sikat na si Nonito “The Filipino Flash” Donaire nga maoy kampeyon sa bantamweight division awtomatikong paborito kini sa mga intriga.
Ning bag-ohay lang naisyu ang dugay nang panagbingkil nila sa iyang amahan nga si Nonito Sr. pero giingong na-patch up na kini. Duna na say bag-ong isyu nga migawas nga dunay plano mobalhin o kuhaon sa Golden Boy Promotions ni Oscar dela Hoya si Donaire.
Si Bob Arum, ang promoter ni Donaire sa Top Rank mibahad nga di basta ihatag si Donaire nga walay binuk-anay og ulo sa korte. Sus! Nakahinumdom ba mo nga si Pacquiao mao gihapong mga isyu ang migawas?
Nabikil daw si Pacman sa iyang papa ug nagplanong mobalhin kaniadto si Pacman sa GBP. Dili ba parehas lang ang isyu. Ambot kung tinuyo ni or unsa pero kamo nalay igo.
Ako diay kumustahon akong mga brothers and sister sa Alpha Sigma Omega International Collegiate Service Fraternity and Sorority kabahin sa “Tsinelas Project.” Palihug ihatag na ang inyong mga donasyon ngadto kang Intsik.
PAGTULUN-AN: ‘Mas maayong aduna kay mubo nga lapis imbes hait nga memoriya’