CEBU, Philippines - Laing hagit ang atubangon sa Sugbuanong cycling teen sensation Luis Miguel “Igi” Maximo sa iyang pagsalmot sa Tour ni Clark karon didto sa Clark Economic Zone sa Clark, Pampanga.
Ang SAC awardee ug 3-time Philippine Premiere Cycling League junior cyclist champion nga si Maximo musalmot sa Criterium Race 42km ug Road Race 71.1km.
Dili sayun ang misyon ni Maximo tungod kay makiglumba siya sa mga top cyclist sa nasud nga maguwang pa og duha ngadto sa tulo ka tuig kaniya. Lakip niini ang mga elite junior racers ug triathletes sa Manila .
Gawas pa niini, miangkon usab ang Team Maximo nga kuwang sa ensayo ang batan-ong siklista tungod kay una niining giatiman ang iyang pagtungha didto sa Springdale School .
Bisan pa niini, masaligon ang Team Maximo nga mulusot sa top five si Igimax nga muhatag og laing dungog sa Sugbu.
Sama sa gihapon si Igimax mugamit sa racing bike sa iyang sponsor nga YKK Trading ni James Montecillo. Gisuportahan usab siya sa OZ Racing ug Maximas Air Conditioning. - (BANAT NEWS)