CEBU, Philippines - Desidido si kanhi flyweight contender Jimrex “Executioner” Jaca nga buhion ang iyang paglaum alang sa laing world title fight og sugdan niya kini sa iyang sangka batok sa kababayan nga si Arnel Dunal sa main event sa “The Night of Gladiators” karong gabii didto sa Tabunok Sports Complex.
Ubos sa R.S Boxing Promotion, tinguha sa Pinoy knockout artist nga ipadayun ang iyang nindot nga kampaniya niadtong miaging tuig diin mirehistro siya og upat ka kadaugan, pulos nagagikan sa knockout.
Unang giparang batok ni Jaca mao ang Panamanin champion nga si William Gonzales, apan ang naulahi kalit nga misibug human sa personal nga problema sa balaod didto sa Panama.
Apan bisan pa niini, si R.S Promotion big boss Rafael Sancho mipasalig og usa ka kulbahinam nga sangka tali ni Jaca ug Dunal kinsa di magduha-duha pagkulit og upset.
“This boy (Dunal) has a good physique and he is big and we will surely be expecting a great and exciting fight for the boxing crowd,” matud pa ni Sancho atol sa press conference kagahapon didto sa Wine Shop Bar sa Gorordo Avenue .
Sa supporting bout, ang kanhi Spanish amateur champion nga si Felix Soria muharong sa taga-Butuan nga si Giovanni Rota sa Bernard Yu Stable.
Mokumpleto sa undercard mao sila si Julios Alcos batok ni Tantan Ricablanca, Virgilio Silvano batok Erwin Pulvera, Dodie Boy Penalosa batok ni Jun Morano, Sarry Canonigo batok ni Roel Honor ug Jelbert Bacalso batok ni Junny Salogaol. (BANATSPORTS)