Igot Trucking, Solmeat mitaktak sa ilang kontra

CEBU, Philippines - Misamot kadaku ang kahigayonan sa Igot Trucking ug Solmeat nga makasud sa semis human nila gipanglubong ang tagsa-tagsa nga kaatbang sa LLBA Rollway Cup basketball tournament didto sa Villas Magallanes gym sa Lapu-Lapu City.

Yano kaayong midaog ang Igot Trucking ni Junax Igot dihang ilang gilubong ang 3MRJ, 93-78, samtang ang Solmeat ni Leo Bascon mi-ihaw sa Yan C Rico, 79-67.

Ang 3MRJ ni Nato Casinillo ug Yan C Rico ni Atty. Rico Amores hingpit na nga nanamilit sa torneyo.

Sa pagpangulo ni Ricky Wagwag, kinsa mipabuto og 22 puntos, ang Igot Trucking wala kaayo makaproblema kay ilang gikontrolar ang duwa gikan sa pagsugod hangtod na sa pagkahuman aron palagputon ang 3MRJ.

Si Edgardo Lungay mitikdol og 16 puntos, ug si Allan Reyes mitimang og 11 puntos alang sa Igot Trucking nga kinahanglang modaog sa sunod nilang duwa sa quarterfinals aron makakuha og luna sa semis.

Ang natagak nga 3MRJ gipangulohan ni Pompey Ngujo, kinsa midakdak og 26 puntos, gisundan ni Christopher Sayson sa iyang 15 puntos. Sila si Lando Baricuatro ug Dindo dela Rama parehong mibundak og 12 puntos sa maong kapildihan.

Sa laing bahin, upat ka players sa Solmeat nga gipangulohan ni Jerome Plarisan ang miligwat og double figures sa iyang 19 puntos.

Si Andrei Aton mi-iskor og 24 puntos ug si Bong Juntilla may 20 puntos alang sa pilderong Yan C Rico.

Ang LLBA Rollway Cup gipaluyohan sab ni Rolly dela Pieza ug sa JB Sportswear. (BANATSPORTS)