Magsaysay climbathon pre-race briefing

CEBU, Philippines - Gipanawagan ang mga partisipante sa "Paghandum ni Magsaysay Climbathon" sa Mt. Manunggal nga gikatakda sa Marso 19 pagtambong sa pre-race briefing karong Sabado diha sa buhatan ni Provincial Board Member Alex Binghay nga nahimutang sa legislative building sa Provincial Capitol.

Ang nahisgutang kalihukan mosubay og 21-kilometer climbathon gikan sa municipal oval sa Balamban paingon ngadto sa Mt. Manunggal.

Naglatid kini og tulo ka kategoriya -- open, executive ug fun runners.

Ang registration centers naglakip sa Balamban Municipal Hall (Mayor's office) ug sa Columbia Store sa SM (buyon sa Duty Free). Ang registration nagkantidad og P350.

Mahimong mopalista ug mobayad sa ilang entry fees atol sa pre-race briefing. Wala nay on-site registration aron dili madelatar ang lumba.

Human sa climbathon, isunod dayon ang mountainbike inig ka ugma.

Ang maong kalihukan kabahin sa ika-54 nga komemorasyon sa pagkamatay ni president Ramon Magsaysay. Niadtong Marso 17, 1957 ang gisakyan niyang abyon, Mt. Pinatubo nahagsa sa Mt. Manunggal.

Ang kalihukan gipaluyohan sa San Miguel Beer, Governor Gwen Garcia, PB Alex S. Binghay, PB Ian Zambo, Habagat, TWO, Adventure Cafe, K33, Columbia Sports ug ang lungsod sa Balamban. – BANAT NEWS