CEBU, Philippines - Laing dakung chess tournament ang mahitabo sa pagsikad sa ikaduhang hugna sa PMS Chess Club Inc. (PMSCCI) Monthly Chess Tournament Cup karong Marso 27 didto sa V-Corner Rabaya St. Nonoc Brgy. Tabunok, siyudad sa Talisay.
Gibahin sa kiddies (elementary) ug juniors (secondary) categories, ang usa ka adlaw nga torneyo mosubay sa 7-round swiss system format diin ang mga magduduwa hatagan og 25 minutos matag usa aron tapuson ang duwa.
Giklaro ni PMSCCI president Loreo Powao nga ang torneyo bukas lang sa mga residente sa siyudad sa Talisay.
Sa mga gustong mosalmot, ang registration nagkantidad og P30 sa juniors ug P20 sa kiddies category. Gipahinumduman usab ang mga partisipante nga magdala og school I.D atol sa registration sa adlaw mismo sa duwa.
Ganting salapi, tropeyo ug medalya ang giandam sa top eight placers sa matag dibisyon . (BANAT NEWS)