Comeback fight ni Nietes

CEBU, Philippines - Ang premyadong boxing promotions sa nasud nga ALA Promotions ug ABS-CBN Sports mopahigayon og press conference alang sa comeback fight ni WBO minimumweight champion Donnie Nietes karong Huwebes didto sa Diamond Suites and Residence.

Si Nietes, kinsa maoy bida sa "Pinoy Pride 5: Battle of Champions" sunod buwan, ubanan nila ni WBO Youth Asia Pacific champion Jason Pagara, PABA bantamweight champion Roli Gasca ug WBO Oriental featherweight champion Lorenzo Villanueva nga moaway sa undercard.

Si ALA Promotions president ug CEO Michael Aldeguer namahayag nga kini ang labing unang away ni Nietes sa light flyweight division, diin iyang atubangon ang Mehikanong si Armando Vasquez.

Human sa taas nga panahon sa pagplano, nahukman sa ALA Promotions ug ni Nietes nga bakantihan ang minimumweight division aron manimpad sa mas taas nga dibisyon alang sa iyang damgo nga mamahimo usab nga multi-division world champion sama nila ni Manny Pacquiao ug Nonito Donaire Jr. (BANAT NEWS)