RP Team: Lupig sa duwa, apan daog sa publicity

CEBU, Philippines - Kung imong itandi ang ATP (Association of Tennis Professionals) rankings tali sa mga sakop sa RP Team ug sa Japanese Team nga miduwa sa Davis Cup/ Asia Oceana Zone 1, dili na nimo ikahibulong nganong ang Japan ug taghap na lang gyud maoy atong posibleng dag-anan.

Ang Davis Cup maoy usa sa labing inilang international team event alang sa men’s tennis nga gidumala sa International Tennis Federation o ITF. Adunay duha ka teams nga magsangka diin ang duha ka nasud mopadala sa ilang mga inilang players kinsa makigsangka ubos sa knock-out format.

Ang Davis Cup gisugdan kaniadtong tuig 1990 diin nagtigi sa abilidad ang mga bantugang tennis players gikan sa Grreat Britain batok sa United States. Sa tuig 2007, mikabat sa 137 ka nasud ang misalmot sa maong kumpetisyon ug ang labing malamposong nasud nga misalmot sa Davis Cup mao ang United States kinsa aduna nay 32 ka korona ug may 29 ka second placers.

Ang Australia maoy ikaduha sa ilang 28 ka korona ug nahimong runner-up sulod sa 19 ka higayon.

Ang kasamtangang kampiyon mao ang Serbia kinsa mipukan sa France.

Wala’y torneyo sa Davis Cup alang sa mga babaye tungod kay ang ngalan sa ilang kumpetisyon mao ang Fed Cup.

Kanunay kitang mosalmot sa mga international competitions tungod kay hapit tanang matang sa duwa maantigo ang mga Pilipino. Ang problema lang gud nato kay hangtod karopn wala pa nato matumbok kung unsang matanga sa sports kita angayan modominar ug wala kita mahibalo unsay angayan buhaton.

Upat ka manok ang atong gipaduwa dinhi sa Sugbo sa Davis Cup gikan sa Marso 4-6 didto sa Plantation Bay Resort Hotel and Spa. Nalupig man tuod kita sa duwa apan makatampo sa atong ekonomiya ang pag-abot sa Japanse Team dinhi.

Ang atong mga manok mao sila si captain ball Cecil Mamiit, ang 36 anyos nga ika-738 sa ATP ranking, Treat Huey nga ika-883 sa ATP ranking, Johnny Arcilla nga wala malakip sa ATP ranking ug si Vucente Elberto Anasta kinsa wala sab malakip sa ATP ranking.

Ang Japanese team gilangkuban nilang captain ball Elji Takeuchi, Go Soeda kinsa ika-110 sa ATP ranking ug maoy pinakabata nga nagpangedaron lang ug 27 anyos, si Tatsuma Ito nga ika-171, Hirochi Kondo nga ika-313 ug si Takao Suzuki nga maoy pinakalayo sa ranking isip ika-508 apan kung imong itandi si Suzuki kang Mamiit, biya sa singles ranking og 567 puntos ug kini dili tiaw nga distansya kay pwerte gyung layoa ug misamot pa gyud kalayo si Huey kay lagi ika-883 man siya sa ranking.

Dugang niini, mas labaw nang daan ang Japan batok sa Pilipinas sa ilang head-to-head match-up, 17-9 busa kung sa binugoy pang pagkasulti, wala gyud kita’y por siyentong madag-an. Ang nakabentaha ra gyud sa Pilipinas mao ang guts ilabi na kay kanunay kita maglaum nga adunay milagrong mahitabo.

Ang Davis Cup unang gihimo sa upat ka tennis players gikan sa Harvard University niadtong 1899 tungod kay gusto silang makigsangka sa mga British players. Ang nagmugna niini mao si Dwight F. Davis kinsa mao sab ang nalatid sa lagda sa torneyo. Ang unang mga tropeyo nga gipanghatag pinalit gikan sa kaugalingong pundo ni Davis.

Wala madugay, si Davis nahimong usa ka political leader sa United States niadtong 1920 diin nahimo siyang Secretary of War gikan sa 1925-29 ug nagsilbi sab siyang Governor-General dinhi sa Pilipinas gikan sa 1929–32.

Sa kasaysayan sa Davis Cup, unang midaog ang United States batok sa Britain ubos sa ngalan “Britain Isles” nga didto giduwa sa Longwood Cricket Club sa Boston, Massachusetts. Nianang pagka 1901, parehong wala mosalmot ang United states ug Britain ug niadtong 1902, midaog na sab ang United States ug niadtong 1095, gipalapdan ang Davis Cup diin misalmot na ang Belgium, Austria, France ug Australasia nga nagkumbinar sa mga players gikan sa Australia ug New Zealand ug misalmot hangtod na sa tuig 1914.

Ang maong torneyo unang gitawag og International Lawn Tennis Challenge sa wala pa usba ngadto sa Davis Cup isip pagtamod kang Dwight Davis.  - BANAT NEWS