CEBU, Philippines - Nagpakitang gilas ang rookie nga si Blake Griffin kinsa miposa og 18 puntos, mihakot og 12 ka rebounds ug may career-high nga siyam ka assists aron pangulohan ang Los Angeles Clippers ngadto sa 100-94 nga upset victory kagahapon batok sa Denver Nuggets sa nagpadayong duwa sa National Basketball Association (NBA) didto sa Staples Center sa Los Angeles, California.
Gawas kang Griffin, dako sab kaayo’g gikatampo ang sophomore nga si Eric Bledsoe sa ilang kadaogan human siya mo-iskor og 15 sa iyang career-high 20 puntos sa fourth quarter ug ang bag-ong nitipon sa Clippers nga si Mo Williams midugang og 17 puntos.
Mahinungdanon kaayo ang opensa ni Bledsoe ilabi na kay napiang sa iyang tuong pulso si Eric Gordon kinsa usa sab sa sinaligan sa Clippers.
Si Hilario Nene maoy nangu sa Denver sa iyang 25 puntos ug mitabla sa iyang season-high nga 14 ka rebounds. Mibahug og 11 puntos si Kenyon Martin sa wala pa siya mo-foul out sa kataposang 10.6 segundos.
Ang Nuggets biya na karon og tulo ka duwa sa Oklahoma City sa ilang dibisyon.
Si Gordon mibiya sa duwa may 5:08 ang nahibilin sa second quarter human siya mahagba og kusog tungod sa foul gikan ni Timofey Mozgov samtang mosuway unta pag-lay up ug ang Clippers naglabaw, 43-29. Bag-o lang usab miduwa si Gordon human mopalta og 18 ka duwa.
Wala na siya mahatagi og higayon alang sa duha ka free throws ug gidala dayon siya sa X-ray room.
Si Gordon sakop sa U.S. national team nga maoy midaog sa gold medal sa World Basketball Championship didto sa Turkey kaniadtong summer. Nag-average siya og 24.1 points ug 4.5 assists.
Ang Nuggets naghupot na og 5-2 nga baraha sukad ilang gi-trade sila si Carmelo Anthony ug Chauncey Billups didto sa New York Knicks sa usa ka multiplayer trade nga maoy nagpabalhin kanilang Mozgov, Wilson Chandler, Raymond Felton ug Danilo Gallinari. - GGM gikan sa NBA.com