CRV ug Matthew daog sa FYA

CEBU, Philippines - Parehong midaog ang CRV quintet ug ang Matthew kaniadtong Sabado sa nagpadayong 3rd F. Llamas Youth Association (FYA) basketball tournament didto sa sitio Manggahan open court sa barangay Punta Princesa, ning dakbayan.

Ang CRV nakalingkawas human sa three-point play ni Marnil Tomada aron mo-iskor og 67-61 nga kadaogan batok sa Team Habagat samtang gipakaging sa Matthew ang defending champion Simpolang Barbecue Haus, 69-64 sa laing makalingaw nga sangka.

Igo lang unta naglabaw ang CRV og usa ka palito, 62-61 sa nahibiling pipila ka segundos apan wala sila mag-usik sa ilang ball possession ug nakahimo’g three-point play si Tomada nga maoy nahimong yawe sa kadaogan tungod kay dihang na-inat nila ang ilang labaw ngadto sa kuatro puntos, 65-61, wala na makapasulod og basket ang Habagat alang sa 67-61 nga kadaogan.

Sila si Ranel Patalita ug Dexter Caballero kinsa parehong abtik nga offguards, maoy nangu sa CRV sa ilang 16 puntos matag usa samtang si Tomada midugang og sayis puntos lakip na ang krusyal kaayong three-point play. Ang team owner nga si Michael Garcia midugang og singko puntos.

Mao pa kadto’y unang duwa sa CRV ug ang Habagat naka-angkon sab sa ilang unang pilde sulod sa duha ka duwa alang sa 1-1 nga baraha.

Wala nakatabang sa Habagat mao ang 20 puntos ni Tata Laborte ug ingon man usab ang 10 puntos nga amot ni Tonyo Abellla.

Sa laing bahin, ang kadaogan sa Matthew naghagat sab kanila og 1-1 nga baraha samtang ang Simpolang wala pay daog sulod sa duha ka duwa.

Si Jaime Atuel maoy nangu sa Matthew sa iyang 16 puntos ug si Dodong Cabigas midugang og 15 puntos ug laing duha ka kauban ang mitampo og double figures.

Ang Simpolang miduwa nga wala ang ilang top point guard ug ex- USJR Jaguar nga si Giovanni Canceko kinsa adunay trabaho atol sa ilang duwa ug si Ryan Villaver maoy ilang gisaligan sa opensa pinaagi sa iyang 16 puntos.

Misaksi sa naasoy’ng duwa kaniadtong Sabado sila si konsehal Leo Lauron ug si Boy Atillo kinsa mao sab ang ilang tournament director. - BANAT NEWS