CEBU, Philippines - Di gihapon mabangbang ang padayong pagpangharus sa Rain or Shine Elasto Painters human sila mukulit sa ikatulong sunod-sunod nga daog alang sa solong liderato sa PBA Commissioners Cup.
Katapusang gibiktima sa Painters ni coach Yeng Guiao ang samaran nga Powerade Tigers, 102-92 kagabii didto sa Araneta Coliseum.
Bitbit ang momentum human sa duha ka dagku nilang kadaogan batok sa mga power-house team Derby Ace ug Meralco, puno sa swabe kaayong gipagana sa Painters ang ilang opensiba nga miresulta sa 14 puntos nga labaw sa halftime, 55-41.
Sama sa gihapon ang ace import nga si Hassan Adams, kanhi NBA cager, mipakita sa iyang pagkadominante dihang gi-outscore niya ang import sa Tigers nga si Russel Carter. Si Adams miposa og 21 puntos, samtang si Carter nakahimo og 17 puntos.
Miaksiyon paggukod ang Tigers sa third period human mipabuto og 15 sa iyang 24 puntos si David aron inaug ang labaw sa tres puntos, 80-83.
Apan daling napawung sa Painters ang scoring run sa Tigers, human usab sa ilang lig-on nga depensa uban sa sunod-sunod nga tira ni Gabe Norwood nga maoy miinat sa labaw sa nuybe puntos, 98-89, sa nahibiling dos minutos sa duwa. - BANAT NEWS