XTERRA Off-Road Triathlon mosikad karon

CEBU, Philippines - Kasaysayan mapatik sa Cebu sporting world karong adlawa diin ang labing unang XTERRA Philippine Championship Off-Road Triathlon mosikad sayo ning buntaga didto sa Amara Subdivision sa Brgy. Catarman sa Liloan.

Mga banggiitang pro triathletes sa tibuok kalibutan ang nidagsa didto sa Liloan aron mopakita sa ilang katakus ning talagsaon ug kulbahinam, nga kompetisyon nga gipresentar ni Alaska Milk Corporation (AMC) president Wilfred Steven Uytengsu pinaagi sa Sunrise Events Inc. (SEI).

Mangulo niining three-in-one event mao ang 2010 XTERRA world champion Shonny Vanladingham; 2008 Japan, Saipan ug France champion Renata Bucher; 2009 Japan, Saipan ug Guam champion Sam Gardner; 2009 Amateur World champion Darrelle Parker; 2009 ug 2010 South Africa champion Carina Wasle; ug uban pang pundok sa mga langyaw'ng atleta.

Gawas pa niini, si Neil Catiil, ang reigning Ironman 70.3 champion, Noy Jopson, 2009 Ironman 70.3 champion, LC Langit, Philippine Triathlon Team member ug uban pang Filipino elites ang mopakita sab sa ilang katakus.

Dul-an sa 100 ka mga entrante gikan sa 11 ka nasud nga mao ang Australia, Austria, Brazil, Canada, Japan, Malaysia, Scotland, Singapore, Switzerland, United Kingdom ug United States ang magsinukdanay sa abilidad.

Ang XTERRA sugdan sa langoy sud sa duha ka loops nga adunay 1.5 kilometer course duol sa kadagatan sa century-old Liloan lighthouse. Sundan sa mountainbike nga mosikad og 32-kilometer loop sa makaduha ug tapuson pinaagi sa dagan sa gilay-on nga 10 kilometros duol sa San Fernando Rey Parish Church. (BANATSPORTS)