CEBU, Philippines - Todo bigay ang mahitabo sa duwa tali sa Asian College of Technology (ACT) Cyber Knights ug Ave Maria Sanctuary Park nga mag-ilog sa solong liderato sa dihang ang aksiyon sa 1st M. Lhuillier Kwarta Padala-Cebu Basketball Association (CBA) season padayonon karong adlawa diha sa Cebu Coliseum.
Ang ACT ug Ave Maria nga nidaog sa unang adlaw sa CBA niadtong miaging Domingo magtigi sa main game sa alas-6 sa gabii human sa engkuwentro sa Mandaue Landmasters ug Salazar Colleges of Science and Institute of Technology (SCSIT) nga gikatakda sa alas-4 sa hapon.
Gisugdan sa ACT ang ilang kampanya pinaagi sa pagposte'g 78-67 nga kadaugan batok sa Hotel Fortuna, samtang ang Ave Maria misugod sa ilang kampanya pinaagi sa pagpulbos sa Mandaue Landmasters, 88-81.
Sa gihapon, ang Cyber Knights maghangad sa abilidad nilang Michael Luga, Robert Villaver, Abe Galinato, Ronaldo Bucao, Milfred Sampleo ug Alano Capatulan alang sa ilang opensa.Sa pikas bahin, ang Ave Maria magsandig sab nilang Jercules Tangkay, Danny Aying, Gerry Cavan, Alex Cainglet, Ope Abellana, Manny Gabas, Kurt Amores ug Enrico Lanto.
Ang higanteng torneyo nga gipasiugdahan sa M. Lhuillier Group of Companies ug sa pakig-alayon sa Cebu City Sports Commission mosubay og single round robin format. Ang top two teams makaangkon og luna alang sa sunod nga hugna sa kompetisyon.
Ang no. 3 ug no. 4 qualifiers makabaton og "twice-to-beat" incentives batok sa lower-ranked squads sa playoffs.
Ang nahabiling upat ka teams moduwa og laing single round robin diin ang top two magsangka alang sa "best-of-three" finals series.
Nagtagingting nga P200,000 ang madawat alang sa kampiyon, samtang ang ikaduha makaangkon og P100,000. Ang third ug fourth placers mobulsa og P60,000 ug P40,000 matag usa. (BANATSPORTS)