UV Lancers mopahigayo'g try-out
CEBU, Philippines - Sa tinguha nga mobalik og kalig-on ang ilang koponan human mapakyas sa kampanya nila sa miaging tuig nga Cebu Schools Athletic Foundation Inc. (CESAFI) men's basketball tournament nga nagtukmod sa pagretiro ni coach Elmer 'Boy' Cabahug, ang University of the Visayas (UV) Green Lancers mopahigayon og try-out karong Lunes gikan sa alas-3 hangtod sa alas-6 sa hapon diha sa UV gym.
Si UV assistant vice president for finance and administration Gerald Anthony 'Samsam' V. Gullas, kinsa mao usab ang team manager sa Lancers, nagkanayon nga todo na ang ilang paningkamot nga makaporma pagbalik og lig-on nga line-up aron mabawi ang titulo sa men’s collegiate basketball.
Usa sa gipangandaman sa Lancers mao ang nagsingabot nga Partner’s Cup karong Hulyo.
Matud ni Gullas nga ang try-out bukas sa tanang interesado nga mahisakop sa UV Lancers.
"We will start from scratch. This is going to be an all-out tryout. It is open to all including the regular players and undertrainees of UV," sumala pang Gullas. "We want to select the ‘best of the best’ to form part of the new UV Lancers in the upcoming CESAFI season."
Matud ni Gullas ang try-out pagadumalaon sa ilang bag-ong nakuhang beach tactician, kinsa pormal nilang ipaila ngadto sa media sa Lunes sa buntag sa wala pa matino nga binyu.
Ubos sa pagtimon ni Cabahug, ang UV Lancers nidaog og usa ka makasaysayanon nga siyam ka sunod-sunod nga kampiyonato sukad natukod ang CESAFI niadtong 2000.
Apan naputol ang ilang pagdominar human mibiya ang ilang sinaligang sentro nga si Greg Slaughter nga atua na niduwa sa Ateneo Blue Eagles. (BANATSPORTS)
- Latest
- Trending
