GMA-7 milusad sports program alang sa aspiring boxers

CEBU, Philippines - Aron makakaplag og bag-ong boxing superstars ugma damlag, ang GMA-7 Network pormal nga milusad sa labing una nilang sports program   alang sa mga batan-ong boksidor, kinsa mosunod sa lakang ni Manny 'Pacman' Pacquiao ug uban pang mga sikat nga mga boksidor sa Pilipinas.

Gipasiugdahan ni GMA senior sports correspondent Chino Trinidad, sa abag ni kanhi two-division world champion Gerry "Fearless" Peñalosa ug conditioning coach Christopher Callanta, ang reality sports program nga uloha'g "Buhay Boksingero" isalida sa Abril 24 uban sa boxing hotbed Cebu City isip ilang unang breeding ground.

Pagabidahan kini sa mga bag-ong sulbong nga mga professional fighters gikan sa nagkadaiyang boxing stable dinhi sa Sugbu.

Kini naglakip sa SSG Promotions, Rex 'Wakee' Salud (RWS) Gym, IPI-Omega Gym, Cebu City Sports Center (CCSC) Stable, Sta. Cruz Stable sa Talisay City, TI Cebu Gym, Phil-Aust Boxing Club ug CMAC Gym.

"This is just a way for GMA to help the young boxers of the country. Aalalayan natin tong mga batang to and give them the right foundation for their chosen field," matud pa ni Trinidad atol sa press launching kagahapon didto sa   Cebu City Sports Center conference hall.

Sa iyang bahin, si Peñalosa, kinsa miretiro human sa mabulokon niyang 21 ka tuig sa pro career, mipasalig nga iyang ipaambit ang tanan niyang nakat-onan aron mahait pa ang abilidad sa mga boksidor.

Si Callanta sa iyang bahin, maoy modala sa conditioning sa mga atleta, mohatag nila'g prebilihiyo sa proper nutrition nga iyang gihulagway nga labing importanteng pundasyon alang sa usa ka batan-ong boksidor.

Ang torneyo adunay lima ka weight divisions: 108 lbs., 112 lbs., 115 lbs., 120 lbs. ug 130 lbs.   Matag dibisyon langkuban og 20 ka boksidor nga magbinukbukay sud sa upat ka hugna sa elimination stages diin ang mga mananaog moabante sa semifinals ug finals phase karong Hulyo.

Ang una sa 18 ka mga bouts ipahigayon karong Marso 13 didto sa Mandaue City Plaza Square. (BANATSPORTS)