CEBU, Philippines - Napilian ang Sugbu isip Dancesport Capital of the World, ug ning bag-o laing record-breaking ang pagalimbasogan diin ang Queen City of the South mosuway pagbuak sa Guinness record alang sa labing daku nga board game tournament.
Mosuway na sab ang Sugbu pagbuak sa rekord sa labing daku nga board game tournament nga 1,214 ka partisipanteng niduwa og ahedres sa central city park sa Krasnoyarsk, Russia nga gipasiugdahan ni Eugenie Kuznitsov niadtong Hunyo 2, 2007.
Si Cebu City Sports Commission (CCSC) chairman Edward Hayco miingon nga ang maong paninguha usa ka consolidated idea gikan sa mga publiko ug mga pribadong sektor. Tumong nila nga mokapin sa 2,000 ka partisipante ang mosalmot niining makasaysayanong kompetisyon nga uloha'g "World's Largest Board Game Tournament" nga gikatakda sa bulan sa Septiyembre ning tuiga.
Ang torneyo pagahimuon sa age group ug walay age limit sa mga partisipante.
"This is private and public sector endeavor and an ambitious project to break another record in the sport of chess and anyone can join this historic event," matud ni Hayco sa ilang tigum atol sa malampusong pagpahigayon sa Cebu City Charter Day Chess Open tournament sa miaging adlaw.
Si Hayco, kinsa mao sab ang utok sa record-breaking performance sa pagbuak sa Guinness record isip largest dance class, nagkanayon nga naka-aplay na sila ug nakakuha na usab og claim number gikan sa Guinness. (BANAT NEWS)