CEBU, Philippines - Paninguhaon ni Nyza C. Archival nga dili na mapakyas pagkabkab og bulawang medalya sa ikaduha niyang pagsuway sa 2K sa Pan de Manila 2011 Kiddie Run karong Sabado diha sa Banilad Town Centre (BTC).
Si Archival, tinun-an sa Centre for International Education (CIE) nahimutang sa ikatulo alang sa bronze medal atol sa unang edisyon sa BTC Kiddie Run niadtong Enero sa miaging tuig.
Uban sa rekord nga 11:03 minutos, si Archival buot mobuak sa rekord ni Karina Curvo sa St. Theresa's College (STC) nga nitapos sa unang dapit sa oras nga 9:37 minutos ug Queenhe Rose Ygot sa Canduman, Mandaue City sa oras nga 10:50 minutos.
Onse anyos na hinuon karon sila si Curvo ug Ygot ug gilauman nga adto na kini modagan sa 3K.
Gipahibalo sa organizers nga andam na sila sa maong kalihukan human kini nila gisibog gikan niadtong Enero 29 tungod sa dautang panahon.
Ang lumba nga alang sa kabataan adunay tulo ka kategoriya, Mites (8-anyos ug paubos), Peewee (9 ug 10 anyos) ug Mini (11 ug 12-anyos).
Ang registration kutob lang karong Biyernes sa alas-12 sa udto diha sa BTC admin office.
Sa registration nga P250, ang mga entrante makadawat og libreng jersey ug race number ug ingon man pan de sal gikan sa Pan de Manila.
Ang BTC giabagan sab sa Sports and Fitness Enthusiasts (SAFE) ni Joel Baring alang sa technical operations sa maong lumba. Gipaluyohan sab kini sa Adidas Sports Depot, Bookbugs, Gymboree, Optical Adult & Child, Pancake House, Singapore School of Cebu and Tutoring Club.
Alang sa dugang mga kasayoran, mahimong motawag sa BTC admin office 345-3260 o email sa activities.btc@gmail.com. (BANAT NEWS)