Kampiyonato target sa ACT

CEBU, Philippines - Gihimong pananglitan ni Abellanosa ang iyang kaugalingon nga kanunay mahimong numero uno sa tulo ka higayon sa kalibotan sa politika.

Dugang niini, hataas ang panglantaw ni Abellanosa sa iyang team ug gusto niyang mo-apil ang ACT sa Liga Pilipinas sa umaabot nga panahon kun   hatagan og kahigayonan nga makasulod.

Ang Cyber Knights makigsangka batok sa Hotel Fortuna sa main game karong adlawa human sa opening match tali sa Mandaue city batok sa Ave Maria sanctuary Park   sa 1st M. Lhuillier Kwarta Padala-Cebu Basketball Association (MLKP-CBA) basketball tournament diha sa Cebu Coliseum.

Matud pa ni Abellanosa nga aduna siya’y duha ka dakung rason nganong misalmot siya sa CBA. Una mao ang iyang commitment sa ACT ug sa publiko, ug ang ikaduha mao ang iyang commitment ngadto sa mga players nga iyang giisip nga sakop sa iyang pamilya.

Ang gipamulong ni Abellanosa gidasonan sab nilang Cyber Knights coach Norberto 'Titing' Manalili ug assistant coach Marcelino 'Teroy' Albarillo, kinsa nagkanayon nga magtinabangay sila isip usa ka team ug ipakita ang katakus matag duwa tungod kay alang kanila, mahinungdanon gyud kaayo ang matag duwa.

Sumala pa ni Abellanosa nga kinahanglang ipadayon sa mga players ang birtud sa pagka-competitive sa tanang panahon ug dili kini nila hunongan human sila makatapos sa kolehiyo. Isip usa ka opisyal sa siyudad, andam siya nga motabang aron molambo pag-usab ang semi-pro basketball dinhi sa Sugbu. (BANATSPORTS)