ALA fighters naiganyo

CEBU, Philippines - Nakakuha og dugang inspirasyon ang mga ALA fighters human sa kadaugan ni Nonito Donaire Jr. batok sa Mehikanong si Fernando Montiel aron mailog ang WBC-WBO bantamweight titles niadtong Domingo.

Sila si AJ Banal, Milan Melindo ug Rocky Fuentes nagkanayon nga nabuhi ang ilang dugo tungod sa dalaygon kaayong gipakita sa ilang kababayan ug sama ni Donaire, andam na sila nga mohatag og dungog sa nasud.

"Nindot gyud kaayo tong dauga, maayo gyud kaayong pagka set-up ni Donaire sa iyang left hook nga maoy mipadaog niya kontra Montiel," matud sa WBO AsPac bantamweight champion nga si Banal.

Sa iyang bahin, ang kanhi sparmate ni Donaire nga si Fuentes nahibawo nang daan sa talagsaong kusog sa kumo sa Pinoy boxing champion ug damgo usab niya nga moabot usab ang higayon alang kaniya nga mo-away og world title.

Ang reigning OPBF flyweight king nga si Fuentes nahimong sparmate ni Donaire alang sa sangka niini batok ni Luis Maldonado niadtong 2007.

Gawas sa mga ALA fighters, lakip usab si ALA Promotions president Michael Aldeguer sa gibati og kalipay sa kalampusan ni Donaire. Si Aldeguer, kinsa personal misaksi sa away didto sa Mandalay Bay miingon nga sa maong kadaugan, gikahadlokan na ang mga Pinoy sa kalibotan sa boksing. (BANATSPORTS)