Severino, Enriquez nagsawo sa premyo sa 1st Bombi Aznar Chessfest

CEBU, Philippines - Gisaw-an nila ni FIDE Master Sander Severino ug NM Rogelio Enriquez ang unang dapit sa 1st Bombi Aznar Memorial Open Chess Tournament didto sa E-Mall Activity Center.

Sila si Severino ug Enriquez nagtabla sa unang puwesto sa managsama nilang 8.0 puntos ug miuli ang duha ka chess masters bitbit ang P15,000 matag usa.

Nagtabla sab sila si Johnnel Balquin sa Misamis Oriental ug IM Barlo Nadera sa ikaduhang dapit nga mipupo og 7.5 puntos diin matag usa kanila mibulsa og P4,000.

Ang Sugbuanang si Kim Yap mi-okupar sa ikatulo, samtang sila si Richard Abangan, Rhobel Legaspi sa Antique, Melvin Merelos, King James Torres, Bernardo Ruelo Jr. ug Rommel Asoque maoy mikompleto sa top nine winners nga adunay siyete puntos matag usa.

Si Eden Tumbos sa Bacolod City maoy nanghawod sa ladies division ug si Rhenzi Kyle Sevillano maoy naghari sa kiddies class. Pareho silang nakakuha'g sayes puntos sa siyam ka duwa ug mibulsa og P500 matag usa.

Ang torneyo gipahigayon agi'g pahinungod sa namatay nga national chess master ug Cebu Sports Hall of Famer Engr. Matias 'Bombi' B. Aznar III.

Gipadagan kini sa Rose Pharmacy Chess Club ug gisuportahan sa Southwest Finance Corp., Lapu-Lapu Rural Bank Inc. ug Rural Bank of Matag-ob (Leyte) Inc.  - BANAT NEWS