1st Cebu Charter chessfest karong Pebrero 26-28

CEBU, Philippines - Mga tang-an ug manuwaay og chess lukop nasud ang gilaumang mag-abot sa 1st Cebu City Charter Day Open Chess Tournament nga gikatakda karong Pebrero 26-28 diha sa Elizabeth Mall.

Dul-an sa P300,000 ang giandam nga ganti ngadto sa mga mananaog ning tulo ka adlaw nga kompetisyon nga gibuak sa tulo ka bahin -- open, ladies ug kiddies.

Ang makampiyon sa Open division mobulsa og P100,000, ang runner-up makadawat og P50,000. Mopahiluna gikan sa ikatulo hangtod sa ikalima makaangkon og P30,000, P20,000 ug P10,000 matag usa.

Samtang ang mokampiyon sa ladies ug kiddies makadaog og P3,000, samtang ilang runners-up mobulsa og P2,000.

Ang registration fee nagkantidad og P400 alang sa open category ug P200 alang sa mga estudyante, samtang P100 sa ladies ug kiddies division.

Mahimong magparehistro sa Deep Blue Woodpusher’s Coffee sa SM City-Cebu ug sa Colonnade Chess Club.

Ang torneyo mosubay og 9 rounds Swiss System format uban ang time control nga 1:05 minutos sa matag player.

Ang torneyo nga gipasiugdahan sa Rose Pharmacy Chess Club, gipaluyohan sa Cebu City government pinaagi sa Office of the Committee on Games, Amusement and Sports.

Alang sa dugang detalye, mahimong motawag ni Marvin Ruelan sa 0926-7352951 ug Roger Abella sa 0910-2686890. (BANAT NEWS)