P350T giandam sa 1st Guibuangan Cup basketball tournament

CEBU, Philippines - Mokabat ngadto sa P350,000 nga ganting salapi ang gitagana alang sa mga mananaog sa 1st Guibuangan Invitational Cup Commercial Basketball Tournament nga mosikad karong Huwebes didto sa Guibuangan Sports Complex sa Barili, Cebu.

Gawas sa mga tropeyo, ang kampiyon mobulsa og P130,000, ang second placer makaangkon og P100,000 ug ang third ug fourth placers makadawat og P70,000 ug P50,000 matag usa.

Mga koponan nga magtigi sa upat ka adlaw nga torneyo naglakip sa multi-titled M. Lhuillier Kwarta Padala-Cebu Niños, Misamis Oriental (MisOr Meteors), San Man Corporation sa Davao ug Pacman-GenSan Warriors ni boxing superstar Manny Pacquiao.

 Ang torneyo mosunod og single round robin format, diin ang top two placers maoy magsangka sa kampiyonato.

Gipasiugdahan ni kanhi Cebu Gems assistant coach Rex Salvaña gipaluyohan ni Barili vice mayor Marlon Garcia, Association of Barangay Council (ABC) president Norman Anore, Hon. Calceditha Alquisola ug Guibuangan Brgy. Capt. Nelson Gingoyon. (BANATSPORTS)