Capt. Roque kampiyon na sa PCBA caging

CEBU, Philippines - Mipatigbabaw ang Capt. Roque team batok sa MP Customs Brokerage, 99-96 sa finals aron sakmiton ang korona sa PCBA basketball tournament didto sa Sitio Cemento sa brgy. Pusok sa Lapu-Lapu City.

Si Ericson Carreon maoy miluwas sa Capt. Roque pinaagi sa iyang 3-point play.

Nakailog og bola si Carreon sa nahabiling 26 segundos dayong lusot ug nakakubit pa og foul.

Sa laing bahin, si Ryan Ugsan, kinsa mipabuto og 38 puntos maoy napiling most valuable player.

Ang Capt. Roque nakadawat og P5,000 ug ingon man tropeyo  nga gitunol ni Pusok barangay councilor Papot Beriso ug Kon. Agga Layagen. Ang placer nga MP Customs nakaangkon og P3,000 gikan ni Marte Pimentel ug ang CASYCO nga maoy third placer mibulsa og P2,000 gikan ni Alex Cabagnot.

Ang presidente sa PCBA nga si Francis Ibo mipalanog sa iyang dakung pasalamat sa mga misuporta sa maong liga ilabi na sa mga opisyales sa Brgy. Pusok ug mga sponsors sa kalampusan sa maong torneyo. (BANATSPORTS)