Liloan mo-host Xterra triathlon

CEBU, Philippines - Laing makasaysayanon nga kalihukan sa paugnat sa kusog ang mahitabo dinhi sa Sugbu gumikan kay mao kini ang mo-host sa labing unang off-road triathlon, ang   Xterra Philippines Triathlon Championship karong Marso 6 didto sa Amara, Liloan.

Dili man tuod susama ka taas sa Cobra Ironman Philippines, apan ang mga elite triathlete mag-atubang gihapon og daku nga hagit tungod sa batoon ug tungason nga rota.

Ang triathlon race magsugod sa usa ka 1.5 km swim nga manukad duol sa nabantog nga century-old Liloan lighthouse, sundan sa 32 km bike libot sa Camotes sea ug dayon 10 km run paingon ngadto sa finish line.

Si Wilfred Uytengsu, ang presidente sa Alaska Milk Corporation nga maoy nagpasiugda nagkanayon nga haom ang Amara nga mamahimong binyu tungod kay gawas sa natural nga terrain, luwas usab kini alang sa tanang partisipante.

Kompirmado na nga mosalmot ang mga foreign elite triathletes nga naglakip ni defending Xterra world champion Shonny Vanlandingham, 2009 ug 2010 Guam champion Sam Gardner ug 2009 Germany top finisher Rena Bucher.

Aron patas ug maila ang kusog sa mga Pinoy triathletes, adunay kampiyon alang sa mga Pinoy sama sa Ironman ug sa nagkalain-laing age-group ug relay event.

Nagsugod na ang registration pinaagi sa www.xterraphil.com ug tak-upon kini usa ka semana sa dili pa ang race proper kay mag-andam pa sila sa timing chips. - BANAT NEWS