CEBU, Philippines - Masuk-anon kaayo si Karl Malone nga nagkanayon nga nahibalo siyang dili moluwat sa iyang katungdanan si coach Jerry Sloan sa walay igong rason ug mipasumbingay nga ang iyang kanhi coach gikapoy na sa iyang trabaho tungod sa pipila ka samokan nga players.
“They changed the floor back to old school. They changed the uniform back to old school. Somebody tell the damn players to start playing like old school,” matod pa ni Malone pipila ka gutlo sa wala pa mo-host ang Jazz batok sa Phoenix Suns kaniadtong Biyernes.
Mipadayon si Malone sa pag-ingon “It may work. They spent a lot of money on the rest, now how about you tell the players. I’m just calling it like I see it.”
Si Malone kinsa nakigbinaylo-ay og text messages kang Sloan sikad sa iyang pagbiya isip head coach, mihisgot sab sa maong isyu uban sa mga national sports analysts og mga players nga mga kritiko ni Sloan.
Ang labing vocal nga player sa Jazz sa kasamtangan mao ang star guard nga si Deron Williams kinsa nakigbangi kang Sloan kalabot sa ilang practice schedule ug ingon man usab sa study demands.
Si Sloan ug ang iyang dugay nang assistant nga si Phil Johnson parehong ni-resign kaniadtong Miyerkules human sila mapilde batok sa Chicago ug gipahibalo kini atol sa usa ka press conferecne nga walay bisan usa ka player sa Jazz ang mitambong ug maoy nakapasamot sa kalagot ni Malone.
Si Malone, napili niadtong 1985 draft, ang tuig kanus-a nagsugod si Sloan isip assistant coach sa Jazz. Siya ug ang All-star guard nga si John Stockton parehong natudlo ngadto sa Naismith Basketball Hall of Fame sa tuig 2009. - BANAT NEWS