Mawin's, AMBL pabiling way pilde
CEBU, Philippines - Mikulit og managlahing kadaugan ang Mawin’s Kitchen ug ang AMBL aron magpabiling walay pilde sa nagpadayong MKBC 2011 summer basketball tournament didto sa Vicente Sotto Memorial Gym.
Ang Mawin's Kitchen nilang team owners Maia Adriatico ug Sherwin Lequit mikulit sa ilang ikalimang sunod-sunod nga daog human ilang gipukan ang Playboy sa iskor nga 87-74, samtang ang AMBL ni Allan Lim midaog batok sa Dewfoam, 101-92 pinaagi sa overtime alang sa ilang ikaupat nga daog.
Sa laing duwa, mikulit sa labing unang daog sulod sa upat ka duwa ang Scourge human maka-ipsot batok sa Respawn, 59-54.
Milabaw makadiyot ang Playboy sa first half, apan hinay-hinay kining giilog sa Mawin’s Kitchen pinaagi sa ilang 32-20 scoring run aron pabiling walay pilde sud sa lima ka duwa.
Sila si Lemuel Paguntalan ug Mat Vallejo maoy mga bida sa Mawin’s sa ilang 20 ug 18 puntos matag usa.
Ang Playboy gipangulohan ni Joel Alquizola sa iyang 22 puntos, samtang si Jun Duron midugang og 15 puntos.
Sa laing bahin, si Tonix Carungay, kinsa miamot og 13 puntos alang sa AMBL, maoy mitabla sa duwa, 81-all nga maoy mihatod sa duwa ngadto sa overtime.
Si Lito Navarro mibahog og 25 puntos ug si Glen Birao mihakot og 23 puntos alang sa AMBL. Samtang ang pilderong Dewfoam gipangulohan ni Danny Rabadon sa iyang 21 puntos. (BANATSPORTS)
- Latest
- Trending
