Clijsters reyna sa Aussie Open

CEBU, Philippines - Ang Belgian national tennis star nga si Kim Clijsters yano kaayong mipukan sa iyang kaatbang nga si Li Na sa China sa tulo ka sets sa iskor, 3-6, 6-3, 6-3 aron modaog sa korona sa Australian Open kagahapon, ang iyang ika-upat nga grand slam title.

Yano kaayong gikontrolar ni Clijsters ang sangka batok ni Li kinsa tataw kaayong nagpadala sa pressure didto sa second set ug mibasol sa kasabaan sa iyang mga fans nga maoy naka-amot sa iyang kapildehan.

Medyo nakuratan og kadali si Clijsters sa kusog nga baseline shot ni Li apan dali siyang naka-rekober ug nakatabla sa iskor, 3-3 atol sa second didto sa Rod Laver Arena.

Ang 28 anyos nga si Li tataw kaayong nagpadala sa pressure dihang, iduol siya sa British umpire nga si Alison Lang ug nagkanayon “Can you tell the Chinese don’t teach me how to play tennis?”

Kung kahinumdoman, ang pagka-maldita ni Li nakita sab atol sa iyang semifinal match batok ni Dinara Safina atol sa Beijing Olympics singles tournament dihang iyang gibadlong ang mga sabaan nga katawhan sa pag-ingon “shut up.”

Si Li kinsa nagtinguha isip maoy labing unang Chinese national ug unang Asian nga mahimong kampiyon sa grand slam, masuk-anon kaayong mihapak ginamit ang forehand nga daw senyales sa iyang pag-concede ug naglingo-lingo sa iyang ulo si Clijsters sa kalipay.

“I’m a little shaky still. Congratulations to Li Na. She had a great effort the last two weeks and is definitely a very tough competitor,” matod pa ni Clijsters nga nagkugos sa Daphne Akhurst Memorial Cup.

“A few more grand slam finals together (with Li) would be nice,” dugang pa ni Clijsters.

Ang maong kadaogan maoy ika-upat nga grand slam ni Clijsters sukad siya mobalik og duwa niadtong 2009 human sa duha ka tuig nga pag-retiro.