CEBU, Philippines - Garbo sa Carcar nga si Israel 'RJ' Abarquez mipatigbabaw batok ni Kenneth Abadia sud sa tulo ka sets nila nga kumbati aron pagsakmit sa korona sa 1st DRB Men's Open Tennis Tournament kagahapon didto sa Alta Vista Golf and Country Club.
Unang nanginit si Abadia diin iyang giangkon ang unang set, 6-1.
Apan si Abarquez miladlad sa iyang tinagoang abilidad aron makabawi uban ang kulbahinam nga 7-6 nga kadaugan ug mipuwersa ngadto sa rubbermatch.
Misamot ka kulbahinam ang ikatulong hugna dihang ang duha ka karibal mipakita sa ilang kasinatian sa kampiyonato, apan ang topseed nga si Abarquez daku og pagsalig ug padayon nga nakigbisog hangtod nga naangkon ang 10-8 nga kadaugan batok ni Abadia.
Sa maong kalampusan, si Abarquez mibulsa og P10,000, samtang si Abadia nakaangkon og P5,000. (BANATSPORTS)