CEBU, Philippines - Gipamatud-an sa Alaska Aces ang ilang pagka-hari sa PBA Fiesta Cup dihang ilang gipanitan ang Powerade Tigers, 92-81 sa pagsugod sa Cebu City Mayor's Cup Invitational kagabii diha sa Cebu Coliseum.
Naalkanse og kuwatro puntos ang Alaska sa halftime, 45-41, apan si Joe Devance miposa og tulo ka sunod-sunod three-pointer aron hatagan ang iyang koponan uno punto nga labaw, 60-59 sa katapusang 2:57 sa third period.
Gikan niadto, mainitong nagsinukliay og mga puntos ang duha ka koponan, apan sila si Devance ug Custodio walay puas nga mihirit og mga puntos alang sa tres puntos nga labaw sa Aces, 66-63 paingon sa final period.
Ang Aces mihirit sa ilang unang double digits nga
labaw sa iskor nga 75-64 human sa lay-up ni Mark Borboran.
Ang Tigers sa tuyo nga makan-an ang labaw, mihimo og zone defense, apan wala kini mosalir tungod sab sa ka-agresibo sa duwa sa Aces. Inay nga mahiyos, miburot hinuon ang labaw sa Aces ngadto sa 16 puntos, 92-76 human sa tres ni Tony dela Cruz.
Ang 6-foot-7 nga si Devance maoy nangulo sa Aces nga midiga og 18 puntos, gisundan sa import niining si Eddie Basden sa iyang 14 puntos.
Si Titus Ivory, kinsa mi-iskor og 25 puntos, mao sab ang nangulo sa pilderong Tigers.
Puntos matag usa
Alaska (92) - Devance 18, Basden 14, Hugnatan 12, Borboran 11, Dela Cruz 7, Tenorio6, Baguio 4,Thoss 4, Sotto 1, Cablay 1
Powerade (81) - Ivory 25, David 23, Ritualo 5, Rizada 4, R.Reyes 4, Lanete 4, Calimag 4, Macapagal 4, J.Reyes 3. – BANAT NEWS