CEBU, Philippines - Nakat-on na og leksiyon ang Mehikanong si Alejandro 'Zorrito' Barrera human sa ilang unang sangka batok ni Rey 'Boom Boom' Bautista ug kompiyansa siya nga modaog sa ilang "rematch" sa main event sa "Pinoy Pride 3" boxing card karong Sabado diha sa Pacific grand ballroom sa Waterfront Cebu City Hotel and Casino.
Sa iyang pakig-atubang sa mga sakop sa Cebu sports media kagahapon, si Barrera mipakita sa daku niyang kompiyansa nga modaug pinaagi sa knockout. Gani iyang gihulagway si Bautista nga humok kaayong tumbahon.
"He (Bautista) has a glass chin and weak defense," matud pa ni Barrera atol sa usa ka press luncheon kagahapon didto sa Mooon Café sa Asiatown I.T Park sa Brgy. Apas, ning siyudad. "I came back here to win and I will knock him out in five rounds."
Gikompirmar usab ni Barrera ang mga balita kalabot sa presensiya sa iyang training ni kanhi Mexican champion Daniel Ponce de Leon, kinsa nagsilbe isip iyang sparmate sa training camp.
Kahinumduman, si Ponce de Leon mao ang labing unang boksidor nga mipahamtang og kapildihan ni Bautista atol sa ilang sangka sa main event sa "World Cup of Boxing" niadtong 2007 sa Sacramento, California.
"Alejandro’s sparring with de Leon was a lot of help," matud pa ni Correa. "Daniel knows how to knock Bautista out, that’s why we train for some headshots and hitting his chin."
Giangkon hinuon ni Barrera nga nadutlan siya sa mga kumo ni Bautista atol sa una nilang sangka niadtong Agosto, apan wala ra kini itandi sa iyang natagamtaman sa iyang pakig-spar ni De Leon.
Sa laing bahin, ang kanhi WBC continental Americas featherweight champion, mopahigayon og public workout karong alas-5 sa hapon diha sa Parkmall.
Ang final press conference himuon karong Huwebes diha sa Waterfront, samtang ang official weigh-in himuon sa Biyernes diha sa SM City-Cebu atrium. – BANAT NEWS