8 teams moapil sa Alberto's Pizza Cup

CEBU, Philippines - Mga tinun-an sa nursing gikan sa nagkalain-laing unibersidad dinhi sa Sugbu ang mopakita sa ilang abilidad sa natad sa basketball sa pagbukas sa Alberto's Pizza Cup-Nursing Edition karong Domingo diha sa University of Southern Philippines Foundation (USPF) gym sa Brgy. Lahug, ning siyudad.

Si league coordinator Robert Rafson Chua mitug-an nga walo ka koponan ang kompirmadong mosalmot sa liga, tulo niini naggikan sa Cebu Doctors’ University (CDU) nga mao ang Spartans, Renegades ug Nursery, samtang ang University of San Carlos (USC) moparada og duha ka koponan.

Ang USPF, Southwestern Univesity (SWU) adunay tag-usa ka mga koponan, samtang mag-usa og pwersa ang Cebu Institute of Technology-University (CIT-U) ug ang University of San Jose-Recoletos (USJ-R).

Ang usa ka bulan nga torneyo mosubay og single round robin format. Ang top four moabante sa crossover semifinals diin ang mga mananaog maoy magsangka sa kampiyonato. (BANAT NEWS)