Sportsfest sa Dalaguete gitakda

CEBU, Philippines - Nagkadaiyang kalihukan sa paugnat sa kusog ang modugang og kasadya sa ika-300 nga founding anniversary sa Dalaguete sunod bulan.

Kini naglakip sa fun run, basketball, motocross ug boxing.

Ang Tri-Centennial Fun Run mosikad karong Pebrero 6 nga manukad didto sa Dalaguete Plaza. Aduna kini 10K, 5K ug 3K categories. May kategoriya usab   nga alang lamang sa tinun-an, residente ug lokal nga kawani sa gobiyerno sa maong lungsod.

Ang registration fee nagkantidad og P300, libre na ang hatod-kuha sa mga partisipante gikan Cebu ngadto sa Dalaguete, snacks ug libreng entrance ngadto sa Obong Spring alang sa mga out-of-town runners.

Niadtong interesado nga mosalmot, ang entry forms mahimong makuha diha sa Cebu City Sports Center (CCSC) ug Runnr sa Ayala Center-Cebu.

Alang sa dugang mga kasayoran, mahimong motawag ni Ging Zambrano sa 484-8500 ug Mario Montenegro   0922-8337228.

Sa laing bahin, ang 1st Mayor Ronald Sesante Motocross Cup himuon sa Pebrero 13 ug dayon ang boxing ug ang 1st Congressman Pablo P. Garcia Inter-town basketball tournament nga padayon pa karong giplansa ang mga detalye. (BANAT NEWS)