CEBU, Philippines - Wala palabya ni Joebert Carolino ang kahigayonan nga mohakot og laing titulo dihang iyang gidominar ang 5K run sa University of San Carlos (USC)-College of Commerce kagahapon didto sa USC Talamban Campus.
Ang Milo Marathon regional second placer nga si Carolino mitapos sa dagan sa oras nga 16:38.310 batok sa mga beteranong sila si Adonis Singson (16:41.200) ug Jess Gonzaga (16:53.510) nga miangkon sa ikaduha ug ikatulong dapit.
Lahi hinuon ang nahitabo sa women’s class, dihang mga bag-ong nawong ang miangkon sa unang-tulo ka mga dapit nga gipangulohan ni Lynle Cardenas (24:16.160), uban sa mga runners-up nga sila si Bea Villo (28.14.010) ug Charisse Piramide (28.27.850).
Naghari sa 5K alumni mao si Kenneth Toledo sa oras nga 22:56.660, gisundan nila ni Kareem Durano (26:37.720) ug Jesus Yu (27:00.930) sa ikaduha ug ikatulong dapit.
Ang female RP triathlete nga si Ripples Rafanan-Faelnar mao ang nanghawod sa women’s alumni sa oras nga 30:09.440. Sila si Mae Hormillada (30:54.600) ug Mylene Fufunan (33:14.660) maoy runners-up. Sila si Riez Enriquez (10:11.565) ug Alfie Divinagracia (19:59.219) maoy mipatigbabaw sa tagsa-tagsa nila ka dibisyon sa 3K open.
Sa alumni category, ang midaog mao sila si Derek Vivares (21:40.363) ug Michelle Fontanoza (24:01.568). (BANATSPORTS)