Elite Runners mamundo
CEBU, Philippines - Mga elite runners dinhi sa Sugbu mogahin una og panahon sa ilang kaugalingon nga makapahuway aron makapangandam alang sa sunod-sunod nga mga dagkung lumba.
Ang mga seasoned runner magpundo og kusog alang sa PLDT 10-miler sa Enero 30, Sm2SM 21k half-marathon sa Pebrero 13 ug Smile to the Finish Line sa Pebrero 20.
Si Joel Baring sa Sports and Fitness Enthusiasts (SAFE) Promotions nagkanayon nga tungod niini makahigayon ang mga novice ug beginners nga modaog sa University of San Carlos- College of Commerce (USC-CC) Fun Run karong buntag.
Ang lumba manukad sa USC Talamban Campus football field ug aduna kini 5K ug 3K categories.
Dugang pa ni Baring nga bisan pa og wa ang presensiya sa mga top runners, hugot gihapon ang maong kompetisyon nga salmotan sa 800 ka runners nga magginukdanay alang sa ganting salapi.
Ugmang adlawa ipahigayon usab ang Argao Mud-Trail Run didto sa Argao Nature Park sa Argao.
Ang lumba gibahin sa duha ka dibisyon -- 7K ug 3K. (BANATSPORTS)
- Latest
- Trending
