1st MLKP-CBA mosikad karong Pebrero 27

CEBU, Philippines - Miabot na gyud ang panahon aron mabanhaw ang Cebuano basketball dihang ang nagkadaiyang commercial entities ug local government milusad sa   1st M. Lhuillier-Cebu Basketball Association (CBA) nga mosikad karong Pebrero 27.

Laraw nga mapadayon pa ang himalatyong commercial basketball sa Sugbu, mga local basketball patrons nga gipangulohan ni Cebu City councilor Raul 'Yayoy' Alcoseba mipadayag sa ilang kahinam sa pagmugna og basketball tournament dili lang alang sa mga varsity players, apan lakip na usab ngadto sa mga kanhi collegiate cagers ug out-of-school youth.

"Our aim is to have a basketball nga kadtong mga naka-graduate ug mga out-of-school youth makaduwa diri sa atong liga," matud ni Alcoseba atol sa tigum sa tanang representante sa mga koponan kagahapon didto sa Yayoy’s Grill and Resto Bar.

Aduna nay walo ka koponan ang nikompirmar sa ilang partisipasyon sa CBA ug kini mao ang Asian College of Technology (ACT), La Fortuna Hotel, Salazar Colleges of Science Institute of Technology (SCSIT), Ave Maria Sanctuary Park, Gemmary Pawnshop, Lapu-Lapu, Mandaue ug Talisay City.

Posibleng mapun-an pa ang maong mga koponan nga magsangka sa 18-above competition. 

"This time we want a long-term commercial league and basketball association in Cebu," matud ni Cebu City Councilor ug ACT founder Rodrigo 'Bebot' Abellanosa. "Mas nindot ni kay naa pud ta sa konseho uban ang mga konsehal sa uban pang siyudad nga posibleng makatabang sa financial aspect."

Dugang pa ni Alcoseba nga ang torneyo mosunod sa FIBA rules ug mogamit sa Liga Pilipinas format diin ang mga koponan makakuha og corresponding points basi sa home-and-away system.

Isip main sponsor, ang M. Lhuillier Kwarta Padala mogahin og P200,000 isip cash prizes alang sa mga mananaog diin ang kampiyon mobulsa og P100,000. Ang second placer makadawat og P50,000, samtang ang third ug fourth placers makaangkon og P30,000 ug P20,000 matag usa. – BANAT NEWS