Gitabla away nilang Denoy ug Cabilla

CEBU, Philippines - Miresulta sa usa ka "technical draw" ang away nila ni Along Denoy sa ALA Boxing ug Charlie Cabilla sa Cagayan de Oro sa main event sa ALA-Summit Natural Drinking Water Boxing Tour Series niadtong miaging gabii didto sa Gaisano Countrymall carpark.

Lingaw ang sugod sa sangka sa duha ka boksidor diin nagsinukliay sa ilang mga kinumo sa unang duha ka round, apan nausab ang dagan sa away pag-abot sa ikaupat nga hugna kay gipahamtangan og point deduction sa referee si Cabilla tungod sa pagpunay og headbutt.

Nahunong ang away gumikan kay walay undang ang pag-agas sa dugo sa agtang ni Denoy nga maoy nakapaaghat sa ring physician paghunong sa duwa sa nahabiling 42 segundos sa fourth round.

Sa supporting bouts, pulos mikulit og "unanimous" decision nga kadaugan ang featherweight nga si Jece Cris Rosales ug super flyweight Raymond Tabogon.

Ang Bol-anon nga si Dagohoy mikulata ni Jocel Gestopa sa Consolacion, samtang ang Sugbuanon nga si Tabogon midaog sa puntos batok ni Jeffrey Galsim sa Cagayan de Oro.

Sa undercard, si Mark Bernaldez mipilde ni Rhiyan Canillas, si Christian Apawan midaog batok ni Rodel Wenceslao ug si Eleno Traya mikulata ni Jan Ivor Lastrilla.

Mikompleto sa mga winners mao sila si Mardy Moana, Ryan Cagatulla, Reoxyl Tabogon,Kevin Jake Cataraja, Christian Bacolod, Polid Banal, Melmark Dignos, Raymond Rama ug Romel Tunacao.   (BANAT NEWS)