CEBU, Philippines - Hingpit nang nakompleto ang mga magsangka alang sa titulo sa PBA Philippine Cup, dihang mimartsa ang San Miguel Beermen sa finals human nila gipalagpot ang Brgy.Ginebra Kings, 89-86, sa Game-6 sa ilang “best of seven” semis series kagabii didto sa Araneta Coliseum.
Ang San Miguel franchise may kahigayunan nga madugangan pa ang ilang 18 ka kampiyonato sa ilang pakigharung sa Talk N’ Text Tropang Texters sa “best of seven” championship series.
Sikit ang nahimung away sa duha ka magkaribal nga sister team nga miresulta sa 80-all nga panagtabla sa nahibiling uno minuto sa duwa.
Apan, ang sinaligang forward sa San Miguel nga si Arwind Santos miposa og 10 puntos sa final period aron ihatag ni Beermen coach Ato Agustin ang labing una niyang finals appearance sa PBA.
Subling nagtabla ang duha ka koponan sa naghinapos gna 38.7 segundos sa duwa human sa three-point play ni Eric Menk, apan dali ra usab nga nakabawi ang San Miguel kinsa migamit sa ilang labaw sa rebounding.
Nangulo sa pilderong Ginebra mao si Ronald Tubid kinsa miposa og 19 puntos. - BANAT NEWS