ALA boys nangharus

CEBU, Philippines - Pulos mikulit og impresibong kadaugan ang ALA trio prospect nga sila si Albert Pagara, Boyce Sultan ug Michael Romarate sa tagsa-tagsa nila ka debut fight sa ALA-Cobra "Tunay na Lakas": Boxing's Best fight card niadtong miaging gabii didto sa Asiatown I.T Park sa Brgy. Apas, ning syudad.

Bisan pa sa pagbunok sa ulan, way nakapugong sa tulo ka kanhi amateur sensation sa pagpakita sa ilang abilidad ug kaandam nga musulod sa eksena sa professional boxing.

Ang multiple amateur gold medalist nga si Pagara mipakita nga nga sama sa iyang maguwang nga si Jason Pagara, hayag usab siyag kaugmaun sa boksing, humans siya mi-iskor og knockout batok ni Sandy Cajil sa Futalan Stable.

Ang 16-anyos nga si Pagara mipatugpa og usa ka bangis nga body shot ngadto ni Cajil kinsa miluhod sa nahibiling 31 segundos sa second round.

Samtang si 2010 Tinga Cup silver medalists Sultan migamit sa iyang counter punching aron makuha ang unanimous decision nga kadaugan batok ni Justin Gacos sa DDP stable.

Si Sultan naglabaw sa tulo ka scorecard sa tulo ka hurado, 40-35, 40-35 ug 39-36 batok ni Gacus kinsa gipahamtangan usab og point deduction tungod sa kanunay nga pagpang-head-butt.

Gipakita usab ni Romarate nga usa siya sa mga batan-ong fighter nga atangan sa ALA Gym dihang gipahunung niya sa 1:09 sa fourth round si Rando Espeleta.

Sa main event sa ALA Promotions ug Cobra Energy Drink developmental boxing series, gilupig og pinuntusay ni ALA boy James Bacon si Jake Verano sa Cagayan de Oro, samtang nakaipsot usab sa usa ka split decision nga kadaugan ang taga-Negros nga si Jason Egera batok ni Rolando Magbanua sa Braveheart stable.

Mokumpleto sa resulta sa mga midaog mao si Jomar Cordillo ug Melvin Gumban kinsa pulos midaog via unanimous decision batok nila ni Marlon Talili ug Crispin Salvador. - BANAT NEWS