CEBU, Philippines - Gisaw-an sa GUV Cup volleyball teams ang kasakit ug kalipay atol sa ilang duwa batok sa CESAFI Selection sa Friendship Game niadtong miaging gabii diha sa nagsugwak nga University of San Carlos (USC)-main gym.
Ang GUV Cup men's squad mipukan sa CESAFI sud sa upat ka sets, 3-1, samtang ang ilang counterpart nasugamak ngadto sa GUV Cup belles sud gihapon sa upat ka sets, 25-17, 19-25, 25-17, 25-17.
Ang GUV Cup mainstays nanginit sa sayong bahin ug miangkon sa unang set, 25-20, luyo sa mga paningkamot nilang Norvie Labuga, Jonrey Sasing, Roderick Arenasa, Kennith Bensig, Mike Abria ug Jade Becaldo.
Ang batan-on apan talentado nga CESAFI nakabangon pinaagi sa pagposte og 25-10 nga kadaugan sa ikaduhang set sa pagpangulo ni Leoniel Sanchez, uban nilang Jesriel Pino, Ken Bhoyd Abunda, Kevin Casia, Edward Ybañez, Allan Caspilo ug Dennis Sepulveda.
Apan didto ra kutob ang ilang mga paningkamot kay ang GUV Cup spikers nga nagsalig sa ilang kasinatian ug kahinog, miharos sa sunod nga duha ka sets pinaagi sa paglansang og managsamang iskor, 25-18 aron pagkandado sa kadaugan.
Nakatabang sab sa kadaugan sa GUV Cup silang Edward Carlo Tecson,
Ronald Acojedo, Ronald Moreno, Rolly Mancao, Dave Aresa, Jacky Yrog-irog ug Alfred Daan. (BANATSPORTS)