CEBU, Philippines - Pagkulit og sunod-sunod nga daog maoy punto nilang Alan Veloso ug Nilo Janson sa pagpadayon sa 2011 Yayoy's Grill Double Darts Tournament karong gabii diha sa Yayoy's Grill and Resto Bar sa Orchids Street sa barangay Capitol Site, ning siyudad.
Sila si Veloso ug Janson maoy nanghawod sa labing unang aksiyon sa darts sa 2011 niadtong Biyernes human ilang gipilde ang tandem nilang Steve Montenegro ug Gil Arco.
Ang Yoko Quillope-Wennie Abella tandem mipahiluna sa ikatulo, samtang sila si Odong Pamatian ug Raniel Sarsona mitapos sa ikaupat.
Dugang pa nga mga darters ang gilaumang mosalmot ilabi na ang out-of-towners nga mituyo pag-anhi alang sa mga kalingawan sa Sinulog.
Ang duwa nga gitakda sa alas-8 sa gabii gipasiugdahan sa City Hall Employees Darts Association (CHEDA) uban sa suporta ni City councilor Raul 'Yayoy' Alcoseba. (BANATSPORTS)