CEBU, Philippines - Namunga ang mga paningkamot sa Phoenix Cebu dihang mipupo kini og duha ka titulo sa 1st Malitbog Southern Leyte Open Volleyball Tournament sa miaging gabii didto sa Malitbog, Southern Leyte.
Sa men's division, ang Phoenix Cebu spikers mipuhal sa reigning Cebu Schools Athletic Foundation Inc. (CESAFI) champion University of San Jose-Recoletos (USJ-R) sa upat ka sets aron malangkat ang korona.
Luyo sa mga paningkamot nilang James Ryan Rivera, Roy Ulan, Clifford Cafe, Ronald Melencion, Angellan Visoc ug Ben Jaylo Labide, ang Phoenix Cebu miangkon sa unang duha ka sets, 25-19, 25-20.
Apan, ang USJ-R nakabawi sa ikatulong hut-ong, 25-20 pinaagi sa nagpungasi nga atake nilang Leoniel Sanchez, Ken Bhoyd Abunda, Loujei Tipgos, Kevin Casia, Dave Aresa, Dennis Sepulveda ug Mark Giducos.
Apan ang Phoenix Cebu, daling nakahimo og mga kausaban aron tapuson ang duwa pinaagi sa makutas nga desisyon, 25-23.
Sukwahi sa ilang male counterparts, ang Phoenix Cebu belles wala kasugat bisa'g gamay lang nga problema dihang ilang gipukan ang Southwestern University (SWU) sa straight sets, 25-20, 25-22, 25-22.
Ang four-time Nestea Beach Volley titlist nga si Florian Guttierez maoy nangulo sa kadaugan sa Phoenix Cebu. Nakakuha sab siya og suporta gikan nilang Jullette Mae Marikit, Rachelle Hannah Singson, Ivy Abella, Roselyn Balincasag ug Amor Pepito.
Sa laing bahin, ang University of Southern Philippines Foundation (USPF) milangkat sa third place trophy sa men's ug women's division.
Ang USPF men's squad mipilde sa Eastern Visayas State University (EVSU), 25-16, 25-14, samtang ang ilang women's team mipukan sa USJ-R, 25-22, 25-17. - BANAT NEWS