CEBU, Philippines - Giharus sa Hoopers ni coach Norwin Honoridez ang ilang tanan kaatbang human modaog batok sa MBP Accounting and Law Firm ni Melvin Pañares, 76-72 samtang wala mopatim-aw ang kontra sa Next Gen Security ni Rheeneir Mora ang AGA-CPA ni skipper Sam Malazarte aron modaug pinaagi sa forfeiture sa nagpadayong Philippine Institute of Certified Public Accountants (PICPA) Christmas basketball tournament kagahapon didto sa Capitol Parish gym sa dan Escario, ning dakbayan.
Tungod niini, ang Hoopers ug ang Next Gen maoy mag-abot sa best-of-three championship series nga sugdan sunod semana.Ang MBP ug ang AGA-CPA maoy mag-ilog alang sa ikatulong pwesto.
Ang MBP unta maoy unang nanginit sa maong sangka pinaagi sa ilang 18-11 scoring run nga gipasiugdahan nilang Flor Padios ug Randolph Alegrado kinsa parehong mihakot og 16 puntos sa pilderong team.
Hinoon, hinay-hinay nga mikamang sa unahan ang Hoopers ubos ni Yoli Meso ug maoy naglabaw atol sa halftime, 33-32. Padayon nilang gikontrolar ang duwa atol sa second half pinaagi sa pagtimon ni Lito Ortiz kinsa miposa og 23 puntos aron pangulohan ang opensa sa Hoopers.
Si Ortiz mipabuhagay og sagunson 14 puntos atol sa fourth quarter diin pabiling naglabaw ang Hoopers, 51-47. Nakahuygo sab sila si Benedict Bandala ug Andre Tocao didto sa fourth period aron salbaron ang ilang team.
Nakasikit pag-usab ang MBP luyo sa paningkamot ni Khan Guieb ug nag-agi pa una ug pipila ka tabla ug lead changes ang duha ka teams ug si Edward Bauzon maoy mihatag sa MBP sa ilang kataposang labaw, 67-66 may 58 segundos na lang ang nahibiling oras sa wala pa sila hingpit gipadaplin sa Hoopers.
Human niadto, kanunay nang naglabaw ang Hoopers ug bisan og mosukli ang MBP, wala sila makasustenir ug napilde’g kuwatro puntos.
Parehong mibahug og 18 puntos silang Bauzon ug Guieb alang sa MBP.
Puntos matag usa:
Hoopers (76)— Ortiz 23, Bandala 13, Tocao 12, Meso 6, A. Yu 6, J. Makinao 6, Makinao 4, Balucan 4, Torres 2
MBP (72)— Bauzon 18, Guieb 18, Padios 16, Alegrado 16, Villarin 2, Pañares 2. - BANAT NEWS